以前做體育版記者，男女比例大約係9：1，有咩開心得過成班仔講嘢可以肆無忌憚？後來轉行做headhunt，初期確實幾擔心，因為公司男女比例變咗2：8，唔通要日日扮斯文「知乎者也」上身？但事實證明我係錯嘅，原來女仔講嘢一樣可以好Mean好爆好盡，真係大開眼界。
置身「女兒國」，我已經完全融入嗶哩巴啦嘅工作環境，如果突然靜晒反而好唔慣，就好似今日咁，當大家傾到口水花四濺嘅時候，隔離team女同事走埋嚟打個眼色，氣氛就180度轉變。
我：「做咩阿邊個突然咁嚴肅？畀仔飛？」
女同事好細聲講：「佢都冇仔，何來畀仔飛？經痛呀！費事其他人聽到吖嘛，我扶佢斟杯暖水先。」
我忽然諗起一組英文字「Period Shaming」，原來女同事點樣豪邁都好，講到月經同埋經痛問題嘅時候，亦寧願收埋自己默默承受。聽班女同事講，有時佢哋痛到腳軟都唔敢請假，仲要繼續見candidate繼續見client，返工見到關愛座亦唔敢坐，費事畀人影相擺上網批判。
雖然月經真係唔關我事，但絕對體會到呢份辛苦，間唔中肚痛胃痛都慘啦，經痛仲要定時定候每月到訪。見佢哋將啲止痛藥當糖食，藥力過咗人又再痛，一直無限loop，而其實斟杯暖水係止標唔治本，未必真正幫到手，叫人飲暖水就更加幫唔到。因為我有朋友試過發現經痛越嚟越嚴重，原來係有子宮內膜異位症，跟手排期喺政府醫院做手術，一等就成年咁耐，當時佢剛剛轉新公司，撞正返新工後兩星期就係做手術嘅日子，所以就打嚟問咗少少意見。
我朋友覺得返新工冇幾耐就請假唔係咁好，當時忍唔住話咗佢幾句：「身體重要？定工作重要？」坦白講，我係老闆都寧願你解決咗問題先投入工作，咁先可以100%無後顧之憂，如果咁都唔想你做手術，趁住返得兩星期工不如早啲走啦！7日通知啫，咁嘅老闆跟唔過。
呢單嘢令我知道經痛可能係病，我朋友嗰隻係朱古力瘤，基本上係無法預防嘅疾病，而且亦好常見，平均10個有月經嘅女性就會有1個中招，嚴重嘅可能會造成不育，甚至需要切除子宮或卵巢，絕對唔可以掉以輕心。
喺呢度想呼籲大家，多啲體諒身邊受經痛困擾嘅女性，無論係屋企人、朋友、另一半，或者同事，最好嘅關心唔應該局限於止痛藥或者一杯暖水，而係要鼓勵佢哋去婦科求診做個超聲波檢查，起碼搵出個痛因，以免因為延醫而導致病情惡化，第一步可以先去下面網站做個Self-Test，了解經痛有冇患病風險，千祈唔好拖，建議去婦科照清楚。
測經痛Self-Test：
http://bit.ly/2WoNegg
#EndoMarch #Check_mpain #M痛 #經痛可大可小
Search